Алдағы күндері елімізде қатты аяз болады. Күннің күрт суытуына байланысты «ҚазАвтоЖол» ұлттық компаниясының мамандары түрлі қиындықтардың алдын алуға және жол қауіпсіздігін арттыруға көмектесетін бірнеше кеңесті оқырман назарына ұсынады.
Қозғалтқышты іске қосу
Егер автокөлік механикалық беріліс қорабымен жабдықталған болса, қозғалтқышты оталдырғанда ілініс педалін міндетті түрде басыңыз. Бұл стартердің қозғалтқышты айналдыруын жеңілдетіп, аккумуляторға түсетін жүктемені азайтады.
Жолға шығар алдында автокөлікті жеткілікті деңгейде, бірақ күрт жүктемесіз қыздырыңыз. Бір мезетте қуатты көп тұтынатын жабдықтарды (әйнек пен орындық жылытқыштары, жылыту жүйесін ең жоғары режимге қою, фаралар) қатар қоспаған дұрыс. Оларды кезең-кезеңімен қосу генератор мен аккумуляторды шамадан тыс жүктемеден қорғайды.
Қар және көріну аймағы
Кузовты толық тазалаңыз, әсіресе төбесін. Тежеген кезде төбедегі қар алға сырғып, алдыңғы әйнекті жауып қалуы мүмкін. Ол бірнеше секундқа көріну аймағын шектейді.
Әйнек сүрткіштердің және щеткалардың мұзсыз екеніне, сондай-ақ әйнектердің, оның ішінде бүйір әйнектердің де, толық таза екеніне көз жеткізіңіз.
Әйнек жуғыш сұйықтық және бүріккіш
«Қатпайтын әйнек жуғыш сұйықтықты» құйғаннан кейін оны жүйе арқылы өткізіңіз: әйнекке 2-3 рет сеуіп, сұйықтықтың саптамаларға және шлангілерге дейін жеткенін тексеріңіз. Бұл патрубкаларда су қалдығы қалып, жол үстінде мұз қатудың қаупін төмендетеді.
Орнында қыздыру және шығару жүйесі
Көлікті, әсіресе жиі автоматты іске қосу (автоқосу) қолданылған кезде, бос жүрісте ұзақ уақыт ұстамаңыз: қатты аязда орнында ұзақ қыздыру шығару жүйесі элементтерінің мұздап қалу қаупін арттырады. Тиімді жолы — қысқа қыздыруды абайлап жүрумен алмастырып отыру: бұл автокөліктің жұмыс режиміне жылдамырақ шығуына көмектеседі.
Тұраққа қою және маневр жасау
Автокөлікті тұраққа қойған кезде ұзақ әрі күрт маневр жасауға тура келмейтіндей етіп орналастырыңыз. Суықта резеңке бөлшектердің серпімділігі төмендейді, сондықтан автокөлік толық қызғанға дейін орнында рөлді көп бұрау секілді маневрлерді барынша азайтқан дұрыс.
