Бұл жағдай қала тұрғындарының алаңдаушылығын туғызды. Сарғыш түсті қар жауып тұрғанын байқаған адамдар оның себебін түсіне алмай дал болды. Әлеуметтік желілерде фото-видео жариялады. Желі қолданушыларының дені бұл құбылысты экологиялық ахуалмен байланыстырып, жауапты мекемелерден түсініктеме беруді талап етті, деп хабарлайды F16.kz.
Жағдай қоғам назарын аударған соң, облыстың экология департаменті мамандары жедел түрде тексеру жұмысын бастады.
Қазір қала аумағының әртүрлі аудандарында қардан сынама алынып жатыр. Зертханалық талдаулар аяқталғаннан кейін қардың түсі не себепті өзгергені анықталып, тиісті баға беріледі, — деп хабарлады департамент өкілдері.
Қоршаған ортаны бақылау қызметінің өкілдері зерттеу кезінде ауа құрамындағы ауыр металдар мен өзге де зиянды заттардың мөлшерін қоса анықтайды. Әзірге талдау нәтижелері дайын емес, қосымша ақпарат ресми қорытынды шыққаннан кейін жарияланады.
Мамандардың айтуынша, мұндай табиғи құбылыс кейде атмосфералық ағынмен келетін шаң-тозаңмен, өнеркәсіп кәсіпорындарынан шығарылатын қалдық заттармен немесе ауа райының күрт өзгеруімен байланысты болуы мүмкін. Дегенмен нақты себеп зерттеу қортыныдысы шыққанда белгілі болады.
Айта кетерлігі, қар түсінің өзгеруі тек Өскемен емес, облыстың өзге де елді мекендерінде тіркелген. Атап айтқанда, Ушанов, Степной, Белоусовка, Предгорный, Верхнеберезовка, Первомайка елді мекендерінде, Риддер қаласында тұрғындар осыған ұқсас жағдайды байқаған. Ал Верх-Уба мен Мирный ауылдарында қардың түсі тіпті қызғылт болған.
Қазір тұрғындар экологиялық жағдайға алаңдап, жауапты органдардан ашық әрі нақты ақпарат күтіп отыр. Экология департаменті жағдай бақылауда екенін айтып, зерттеу нәтижелері ресми түрде жарияланатынын жеткізді.
