Өскеменде жауған сарғыш түсті қардан сынама алынды. Нәтижесінде қоршаған ортаға қауіпті ластаушы заттардың шекті рұқсат етілген мөлшерден асуы байқалмады, деп хабарлайды F16.kz.
ШҚО экология департаментінің баспасөз қызметі тұрғындар арасында алаңдаушылық тудырған мәселенің мән-жайын анықтады.
Естеріңізде болса, бұған дейін әлеуметтік желілерде сарғыш түсті қардың фото-видеосы таралып, жұрт дүрліккен. Осыған байланысты экология департаментінің мамандары қала аумағынан қар сынамасын алып, тексеру жүргізді. Зерттеу аккредиттелген зертханада өткізілді. Талдау нәтижелеріне сәйкес, қар құрамында зиянды заттардың шекті рұқсат етілген деңгейден асуы тіркелмеген. Яғни, тұрғындар денсаулығына тікелей қауіп жоқ.
Мамандар қар түсінің өзгеруін табиғи факторлармен байланыстырады. Алдын ала болжам бойынша, бұл құбылыс атмосфералық ауа ағындары арқылы шаң мен құмның тасымалдануынан болуы ықтимал.
«Қазгидромет» РМК деректеріне сүйенсек, 10-11 қаңтар күндері Өскеменде солтүстік-батыстан соққан желдің жылдамдығы секундына 15-20 метрге дейін жеткен. Күшті жел ауадағы ұсақ бөлшектерді көтеріп, олардың қар жамылғысына шөгуіне себеп болған.
Айта кетерлігі, мұндай жағдай өңір үшін таңсық емес. Бұған дейін де Өскеменде қар түсінің өзгеруі 2018 жылы және 2021 жылы тіркелген.
Қазір жағдай уәкілетті органдардың тұрақты бақылауында. Қоршаған ортаның жай-күйіне мониторинг жүргізу жалғасып жатыр. Мамандар тұрғындарды сабыр сақтауға шақырып, ресми ақпаратқа сүйенуге кеңес береді.
