Биылғы 1 қаңтардан бастап Қазақстанда жаңа Салық кодексі күшіне енді. Осыған байланысты бұрын қолданылған арнаулы салық режимдері тоқтатылып, барлық салық төлеушілер жалпыға бірдей белгіленген салық салу тәртібіне көшірілді, деп хабарлайды F16.kz.
Дегенмен Салық кодексінде көзделген талаптарға сай келетін кәсіпкерлерге өтпелі ережелер қарастырылған. Мұндай салық төлеушілер 2026 жылғы 1 наурызға дейін қолданылатын салық салу режимі туралы тиісті хабарламаны ұсынуға тиіс. Егер бұл мерзімде хабарлама берілмесе, кәсіпкер биылғы 1 қаңтардан бастап автоматты түрде жалпыға бірдей белгіленген тәртіп қолданушы болып есептеледі.
Айта кетейік, бұған дейін арнаулы салық режимін пайдаланып келген және 2026 жылдан бастап жалпы тәртіпке көшуді жоспарлаған салық төлеушілер хабарламаны 1 наурызды күтпей-ақ ұсына алады. Бұл жағдайда тіркеу деректеріндегі салық салу режимі 2026 жылғы 1 қаңтардан бастап өзгертіледі. Ал белгіленген мерзімге дейін хабарлама тапсырмаған кәсіпкерлерге жалпыға бірдей салық салу тәртібі автоматты түрде бекітіледі.
Сонымен қатар 2026 жылдан бастап жаңа арнаулы салық режимін таңдаған салық төлеушілерге Салық кодексінің тиісті баптары қолданылады.
Мамандар кәсіпкерлерге салық салу режимін алдын ала нақтылап, құжаттарды уақтылы тапсыруды ұсынады.
