Өскемен қалалық №1 емханада күрделі жөндеу жұмысы аяқталды. Медицина мекемесін заман талабына сай жаңғыртып, қажетті құрал—жабдықпен қамтамасыз етуге облыс бюджетінен екі жылда 680 млн теңге бөлінді, деп хабарлайды F16.kz.
1971 жылдан бері күрделі жөндеу жүргізілмеген емхана ғимараты кейінгі жылдары тозыңқырап, кетеуі кете бастаған еді. Ескірген инженерлік желі жиі сыр беріп, жүйде ақау көбейді. Сондықтан өңір билігі нысанды толық жаңғыртуға шешім қабылдады. Нәтижесінде шатырдан бастап жертөлеге дейін жаңартылды. Инженерлік және электр желілері, жылу жүйесі, есік-терезелер түгел ауыстырылды, сантехникалық жабдықтар жаңартылды, ғимарат іші әрленді. Бұдан бөлек заманауи медициналық құрал-жабдықтар сатып алынды. Енді жаз шыға ғимарат төңірегі абаттандырылады.
Медицина мекемесін күрделі жөндеуге облыс бюджетінен 680 млн теңге бөлініп, емхананың үш ғимаратында тиісті жөндеу жүргізілді. Қосымша медициналық жабдықтар сатып алынды. Атқарылған жұмыс сапасы бірден байқалады, жаңадан ашылғандай жарқырап тұр. Емделушілер алғыс айтып, ризашылық білдіріп жатыр. Біздің мақсат тұрғындарға сапалы медициналық қызмет көрсетуге барынша жағдай жасау, – деді облыс әкімі Нұрымбет Сақтағанов.
Өскемен қалалық №1 емхана – облыс орталығындағы ең ірі денсаулық сақтау ұйымдарының бірі. Мекеме 66 мыңнан астам тұрғынға, оның ішінде 25 мыңнан астам балаға қызмет көрсетеді. Емхананың бас дәрігері Айман Мырамытованың айтуынша, қарамағында 423 маман жұмыс істейді, оның 80-і – дәрігер, 228-і – орта буын қызметкер.
Біздің емхана ересектерге де, балаларға да қызмет көрсетеді. Оған қоса зейнет жасындағы адамдарға арналған бөлім бар. Мамандарымыз жеткілікті, бәрінің кәсіби біліктілігі жоғары. Қаладағы жалғыз балалар нефрологы осында жұмыс істейді. Бүгін әйелдерге кеңес беру бөлімі ашылды. Онда жүкті әйелдерге, ана мен балаға акушерлік-гинекологиялық көмек көрсетіледі. Болашақ аналар мектебі жұмыс істей бастады. Жалпы, күрделі жөндеуден кейін емханада қосымша кабинеттер ашылып, қызмет көрсету ауқымы кеңейді, – деді бас дәрігер.
Бүгінде аталған денсаулық сақтау мекемесінде алғашқы медициналық-санитариялық көмек, консультативті-диагностикалық қызмет, стационарды алмастыратын және шұғыл медициналық көмек көрсетеді. Емхана құрамында диагностикалық қызметтер, күндізгі стационар, call-орталық, отбасылық денсаулық орталығы, жастар орталығы, бейінді мамандар кабинеті, зертханалық-диагностикалық бөлім және басқа да құрылымдық бөлімшелер жұмыс істейді. Цифрлық технологиялар кеңінен енгізілген. Атап айтқанда, «Даму Мед», Saqtandyry, ЕИСЗ, E-health, PACS, SMART ЭКГ секілді медициналық ақпараттық жүйелер қолданылады.
Жаңғырту жұмыстарының нәтижесіндеу емделушілер мен дәрігерлерге қауіпсіз әрі жайлы жағдай жасалып, алғашқы медициналық көмектің сапалы әрі қолжетімді болуы қамтамасыз етілді.
