Өскеменде ерлер мен әйелдер арасында тоғызқұмалақтан облыс чемпионаты басталды. Жарысқа Ұлан, Зайсан, Самар аудандарынан және облыс орталығынан барлығы 28 спортшы қатысып жатыр, деп хабарлайды F16.kz.
Турнирге қатысушылардың деңгейі жоғары. Айталық, жарыста бір спорт шебері, 12 спорт шеберіне үміткер және 15 бірінші разрядты ойыншы бақ сынауда. Ерлер арасында – 16, әйелдер арасында – 12 қатысушы тіркелген.
Аталған чемпионат іріктеу жарысы болып есептеледі. Өз санаттары бойынша бірінші және екінші орын алған спортшылар ақпанда өтетін республикалық чемпионатта Шығыс Қазақстан облысының намысын қорғайды.
Жарыс қорытындысы бойынша жеңімпаздар мен жүлдегерлер дипломдармен және медальдармен марапатталады.
Айта кетейік, «көшпенділер алгебрасы» атанған тоғызқұмалақ ойыншылардан жоғары төзімділік пен терең стратегиялық ойлауды талап етеді. Чемпионат ұлттық спортты насихаттауға және өңірдің үздік зияткер спортшыларын анықтауға бағытталған.
