Қазіргі таңда өңірде ЖРВИ, тұмау және коронавирустық инфекция бойынша эпидемиологиялық жағдай тұрақты. Бұл туралы облыстық санитариялық-эпидемиологиялық бақылау департаменті басшысының орынбасары Сәуле Слямғазина айтты, деп хабарлайды F16.kz.
2025-2026 жылдардағы эпидемиялық маусымда мамандар ЖРВИ-дің 141 493 жағдайын тіркеген. Оның басым бөлігі, яғни 61 пайызы 14 жасқа дейінгі балалар.
Ал тұмаудың зертханалық расталған 182 жағдайы анықталып отыр.
Өткен жылдың сәйкес кезеңімен салыстырғанда ЖРВИ көрсеткіші 4,6%-ға, ал тұмау 8 есеге артқан. Сонымен қатар, 2025–2026 жылдардағы эпидемиялық маусымда облыста коронавирустық инфекцияның 2 жағдайы тіркелді. Осылайша, сырқаттанушылық 13 есеге төмендеді. Вирус анықталмаған пневмония жағдайлары өткен жылы да, биыл да тіркелген жоқ, — деді Сәуле Слямғазина.
ҚР Бас мемлекеттік санитариялық дәрігерінің 2025 жылғы 22 қыркүйектегі №6 қаулысына сәйкес, ЖРВИ мен тұмау бойынша эпидемиялық маусым 2025 жылғы 1 қазаннан 2026 жылғы 1 мамырға дейін жалғасады.
