2023 жылы Астана қаласында мерзімді әскери қызметін атқарған ақтөбелік Әнуар Аринов «Срочник 2.0» мемлекеттік бағдарламасының арқасында С.Аманжолов атындағы Шығыс Қазақстан университетіне грантқа түсті, деп хабарлайды F16.kz.
Әскери борышын өтеу кезінде ұсынылған бұл бағдарлама жас сарбазға азаматтық өмірде жаңа мүмкіндік сыйлаған. Бір жылдан кейін Әнуар университет жанынан ашылған Қабанбай батыр атындағы әскери кафедраға конкурссыз қабылданды. Қазіргі таңда ол жоғары оқу орнында білім алып қана қоймай, әскери кафедрада оқып жүр.
Бастапқыда мұндай мүмкіндік болатынына сенген жоқпын. Қазір университетте және әскери кафедрада қатар білім алып жүрмін. Болашақта лейтенант шенін алып шығамын, – дейді Әнуар Аринов.
Әскери кафедра мұғалімі, запастағы подполковник Айбын Абдулиннің айтуынша, Ануардың әскери тәжірибесі бірден байқалады.
Әскерде болғаны анық көрініп тұр. Тәртібі жақсы, жауапкершілігі жоғары, қатарластарына үнемі көмектесіп жүреді, – дейді ол.
Қазір «Срочник 2.0» бағдарламасы арқылы көптеген жас сарбаздар білім алып, елге қызмет етіп жатыр.
