Түркияның Стамбул қаласында 18 жасқа дейінгі қыздар арасында әлем чемпионаты аяқталды. Дүбірлі бәсекеде Қазақстан құрамасы күміс жүлдегер атанды, деп хабарлайды F16.kz.
Әлем біріншілігінде Қазақстанмен қатар Латвия, Түркия, Жаңа Зеландия, Нидерланды және Оңтүстік Корея құрама командалары (екінші дивизион, А тобы) өнер көрсетті. Нәтижесінде біздің қыздар Жаңа Зеландия (13:2), Латвия (9:1), Түркия (5:1) және Нидерланды (7:0) құрамаларынан басым түсті. Финалда Оңтүстік Корея хоккейшілерімен кездескен қазақстандық ұжым қарсыласынан 1:5 есебімен жеңіліп, күміс медальді місе тұтты.
Айта кетейік, әлем чемпионатында «Торпедо» хоккей клубының өкілдері бас бапкер Мария Федоренко, жаттықтырушы Дарья Дмитриева, қақпашы Мария Яковлева, қорғаушылар Ульяна Куклина, Ева Иншакова, шабуылшылар София Зубкова, Томирис Саяхаткызы, Злата Попова, Айдана Рахаткызы ел намысын қорғады.
