Былтыр еліміздің 11 қаласында ауа ластануының тұрақты жоғары деңгейі тіркелген. Бұл тізімде Өскемен де бар. Экология министрлігі мәселені шешу жолдарын талқылады, деп хабарлайды F16.kz.
Экология және табиғи ресурстар министрлігі ауа ластануына автокөліктер, жеке сектор және шағын бизнес нысандары әсер ететінін мәлім етті.
Мысалы, Алматыда шығарындылардың 60 %-ы көлікке, ал 12%-дан астамы жеке үйлер мен шағын қазандықтарға тиесілі. Осындай жағдай Өскеменде және басқа ірі қалаларда байқалады, — делінген министрлік хабарламасында.
Тиімді шешімдерді зерделеу және үздік халықаралық тәжірибені енгізу мақсатында министрлік өкілдері Қытай Халық Республикасына барып, ауа сапасын басқарудың кешенді тәсілі енгізілген Бейжің қаласының үлгісімен танысты. Бейжіңнің оң тәжірибесін ескере отырып, министрлік әкімдіктерге Экология кодексінің 206-бабына сәйкес 2026-2028 жылдарға арналған атмосфералық ауаны қорғау жөніндегі қағидаларды әзірлеуді тапсырды, онда мыналарды көздеу қажет:
— субсидиялау және ынталандыру шараларымен жеке секторды газдандыру;
— қоғамдық тамақтану мекемелерінде және шағын қазандықтарда қатты отынды пайдалануға тыйым салу;
— объектілерді орталықтандырылған жылумен жабдықтауға қосуды ынталандыру;
— қоғамдық көлік пен таксиді электрге және газға ауыстыру;
— қолайсыз метеожағдай күндері «тақ-жұп күндер» режімі бойынша көліктердің қозғалысын шектеу және экологиялық аймақтарға бөлуді жүргізу;
— өнеркәсіптік аймақтардың айналасында жасыл белдеулер құру.
Айта кетейік, «тақ-жұп күндері» режимі дегеніміз, күннің санымен сәйкес көлікті ғана жүргізуге рұқсат беріледі. Мәселен, тақ күндерде тек тақ нөмірлі көліктер жолға шықса, жұп күндерде тек жұп нөмірлі көліктер жүреді.
