Биылғы 28 ақпан – қолданылатын салық салу режимі туралы хабарлама ұсынудың соңғы күні. Бұл туралы Шығыс Қазақстан облысының мемлекеттік кірістер департаменті мәлімдеді.
Қазір өңірде салық төлеушілерге кең көлемді ақпараттық-түсіндіру жұмыстары жүріп жатыр. Мамандар аумақтық мемлекеттік кірістер басқармаларымен бірлесіп, БАҚ өкілдері, медиа тұлғалар мен блогерлердің қатысуымен жеке кәсіпкерлерге, микро және шағын бизнес субъектілеріне жаңа талаптарды түсіндіреді. Кездесулер базарлар мен халық көп шоғырланатын орындарда өткізіліп жатыр.
Қандай салық режимдері бар?
Қазақстан Республикасының жаңа Салық кодексіне сәйкес арнайы салық режимдерінің үш түрі қарастырылған:
-
өзін-өзі жұмыспен қамтығандар үшін;
-
оңайлатылған декларация негізінде;
-
шаруа және фермер қожалықтары үшін.
Оның ішінде оңайлатылған декларация негізіндегі режимді қолдануды жоспарлаған кәсіпкерлер 2026 жылғы 28 ақпаннан кешіктірмей тиісті хабарлама тапсыруға тиіс.
Хабарлама жолдамаса не болады?
Егер кәсіпкер белгіленген мерзімге дейін хабарлама ұсынбаса, 2026 жылдың 1 қаңтарынан бастап автоматты түрде жалпыға бірдей белгіленген салық салу режиміне көшіріледі.
Хабарлама қалай тапсырылады?
Салық төлеушілер хабарламаны бірнеше тәсілмен жолдай алады:
-
Салық төлеушінің кабинеті арқылы;
-
«e-Salyq Business» мобильді қосымшасы арқылы;
-
тіркелген жері бойынша мемлекеттік кірістер органына барып;
-
екінші деңгейлі банктердің мобильді қосымшаларындағы «Мемлекеттік қызметтер» бөлімі арқылы.
Мамандар кәсіпкерлерді соңғы күнге қалдырмай, құжаттарды алдын ала тапсыруға шақырады. Уақтылы берілген хабарлама – артық әуре-сарсаң мен автоматты түрде басқа режимге ауысып кетудің алдын алады.
