Ресейдің Алтай өлкесіндегі мемлекеттік педагогикалық университет жанында Қазақ тілі мен мәдениеті орталығы жұмыс істейді. Барнаулға жұмыс сапарымен барған ШҚО делегециясы мекеменің жұмысымен танысты, деп хабарлайды F16.kz.
Шығыс Қазақстан облысының әкімі Нұрымбет Сақтағанов орталықтың басшысына алғасын білдіріп, сыйлықтарын табыстады.
Қазақ тілі мен мәдениеті орталығы осыдан 15 жыл бұрын ашылған. Мақсатымыз — қазақ тілін, мәдениеті мен салт-дәстүрін насихаттау. Мәселен, балаға ат қою, бесікке бөлеу, тұсау кесу сынды салттарымыздың мән-мағынасын, маңызын түсіндіреміз. Домбыра шертіп, ән айтып, кітап оқимыз, — дейді орталықтың басшысы Мұрат Бекмұратов.
Қазір Алтай өлкесінде 10 мыңнан астам қазақ болса, оның мыңға жуығы Барнаул қаласында тұрады. Олардың басым бөлігі орталыққа жиі келіп, уақыт өткізетін көрінеді.
