Қазақстанның бірнеше облысында су қоймаларын реконструкциялау бойынша бес жоба әзірленді. Олардың екеуі — Шығыс Қазақстанда, үшеуі Жамбыл облысында жүзеге асырылады, деп хабарлайды F16.kz.
Сонымен қатар жеті облыста 13 су қоймасын реконструкциялау жобасы әзірленіп жатыр.
Биыл тағы сегіз су қоймасын реконструкциялау жобаларын әзірлеу жоспарланған, бұл Батыс Қазақстан, Қызылорда, Қостанай, Түркістан, Солтүстік Қазақстан облыстарында, — деді ҚР су ресурстары және ирригация вице-министрі Ерболат Ибрайханов ОКҚ алаңында өткен баспасөз конференциясында.
Айта кетейік, былтыр Абай облысындағы Шар су қоймасының, Жетісу облысындағы Қызылағаш су қоймасының, сондай-ақ Қостанай облысындағы Албарбөгет бөгетінің реконструкциясы аяқталып, пайдалануға берілді.
