Бүгін Үкімет отырысында жол саласын дамыту мәселесі талқыға салынды. Жиын барысында Шығыс Қазақстан облысының әкімі Нұрымбет Сақтағанов өңірде атқарылып жатқан жұмыстар жайлы баяндады, деп хабарлайды F16.kz.
Қазір облыста елді мекендер мен туристік бағыттарға апаратын кірме жолдарға баса назар аударылып, жүйелі жұмыс жүргізіліп жатыр.
Бүгінгі таңда қанағаттанарлық жағдайдағы жолдардың үлесі 94%-ды құрайды. Өткен жылы ауылдарға апаратын 90 шақырым кірме жолға, негізгі туристік аймақтарға жеткізетін 160 шақырым жолға орташа жөндеу жұмыстары жүргізілді, — деді аймақ басшысы.
Биыл туристік бағыттар бойынша 114 шақырым жолды және елді мекендерге апаратын 100 шақырымнан астам кірме жолды жөндеу жоспарланып отыр. Шемонаиха қаласындағы Үбі өзені арқылы өтетін көпірді қайта жаңғырту жобасы әзірленген. Сонымен қатар Өскемендегі Ертіс өзеніне салынатын көпір құрылысы бойынша жоба дайындалып жатыр. Мемлекеттік сараптаманың қорытындысы биыл шілде айында алынуға тиіс.
«E-Joldar» платформасын іске асыру аясында облыстық маңызы бар автокөлік жолдарына цифрлық паспорттар әзірленді. Биыл бұл жұмыс аудандық маңызы бар жолдар мен елді мекендердің көше-жол желісінде жалғасады. Сондай-ақ ауыспалы жобаларды іске асыруды жалғастыру және өңірдің 300 шақырымнан астам көлік жолдары мен көшелерін қамтитын жаңа жобаларды іске қосу жоспарланған, — деді Нұрымбет Сақтағанов.
