Шығыс Қазақстан облысы Алтай ауданының прокуратурасы жергілікті тұрғынның өтініші бойынша тексеру жүргізді. Өтініште оның қамқорлығындағы немересінің әлеуметтік төлем ала алмай жүргені айтылған, деп хабарлайды F16.kz.
Тексеру барысында өтініш иесі 2023 жылғы тамыздан бастап кәмелетке толмаған баланың заңды өкілі екені анықталды. Соған қарамастан 2023 жылғы тамыздан 2026 жылғы қаңтарға дейін балаға асыраушысынан айырылуына байланысты жәрдемақы тағайындалмаған және төленбеген. Осы жағдай бойынша аудан прокуроры уәкілетті органға прокурорлық акті енгізді.
Прокуратураның араласуынан кейін мектепте оқитын балаға өткен кезең үшін 575 мың теңге көлемінде берешек төленді. Қазір оған ай сайын 46 783 теңге жәрдемақы төленіп отыр. Сонымен қатар колледжде күндізгі бөлімде оқитын оның кәмелетке толған ағасының да құқығы қалпына келтірілді.
Қазір қамқорлықтағы балалардың әлеуметтік құқықтары толық қалпына келтіріліп, төлемдер тұрақты бақылауға алынды.
