Өскеменде Мемлекеттік қызмет істері агенттігінің Шығыс Қазақстан облысы бойынша департаменті жанындағы Әдеп кеңесінің кезекті отырысы өтті, деп хабарлайды F16.kz.
Ведомство басшысы Ермек Айкымбеков төрағалық еткен кездесу барысында мемлекеттік қызмет туралы заңнаманың сақталуы, сыбайлас жемқорлықтың алдын алу мәселелері қаралып, өңірдегі мемлекеттік органдардың есебі тыңдалды.
Күн тәртібіндегі негізгі мәселенің бірі – экология департаментінің былтыр мемлекеттік қызмет туралы заңнаманы сақтау және жемқорлыққа қарсы іс-қимыл бағытында атқарған жұмыс қорытындысы болды. Департамент басшысының міндетін атқарушы Әсет Сүлейменов баяндама жасады.
Әсет Сүлейменов өз сөзінде былтыр департаментте қызметтік тәртіпті күшейту және сыбайлас жемқорлыққа қарсы талаптарды сақтау бағытында жүйелі жұмыс жүргізілгенін айтты.
2025 жылы департаментте қызметтік әдеп талаптарын сақтау және сыбайлас жемқорлықтың алдын алу бойынша тиісті жұыс атқарылды. Бұл бағыттағы жұмыс тұрақты бақылауда болды және заң талаптарына сәйкес жүзеге асырылды. Біздің департамен Экология және табиғи ресурстар министрлігіне қарасты аумақтық орган болғандықтан өз қызметін қолданыстағы заңнама аясында жүргізеді, – деді ол.
Сондай-ақ отырыста былтыр өңірде мемлекеттік органдарда жұмыс уақыты режимінің сақталуына жүргізілген талдау нәтижелері де қаралды. Кеңес мүшелері мемлекеттік қызметтің тиімділігін арттыру, тәртіпті нығайту және өңірдегі мемлекеттік органдарда алдын алу жұмыстарын одан әрі жетілдіру мәселелерін талқылады.
