Өскемендегі «Казцинк» кәсіпорнына тиесілі металлургиялық кешенде экология талаптары бұзылғаны анықталды. Бұл туралы тиісті тексеру жүргізген Шығыс Қазақстан облысының экология департаменті мәлім етті, деп хабарлайды F16.kz.
Бірнеше күнге жалғасқан қолайсыз метеорология жағдайларына байланысты жоспардан тыс тексеру жүргізілді. Мамандар кәсіпорынның Өскемен металлургиялық алаңындағы көздерге бақылау жүргізді. Нәтижесінде ауаға тарайтын зиянды заттардың белгіленген нормадан едәуір асып кеткені белгілі болды.
Атап айтқанда, күкірт диоксиді – 3,5 есе, көміртек оксиді – 2 есеге, ал азот оксиді – 1,5 есе жоғарылаған. Сарапшылардың айтуынша, бұл көрсеткіштер шаң-газ ұстау жабдықтарының тиімділігі төмен екенін және түтін газының тиісті деңгейде тазартылмай отырғанын аңғартады.
Сонымен қатар қолайсыз метеорология жағдайлары кезінде ауаға бөлінетін газды азайту талаптары сақталмаған. Бұл өз кезегінде экологиялық рұқсат шарттарының бұзылуына әкелген.
Тексеру қорытындысы бойынша кәсіпорынға 20 млн теңге көлемінде айыппұл салынып, әкімшілік жаза тағайындалды. Бұған қоса кемшіліктерді жою туралы арнайы нұсқама берілді.
Экология департаментінің мамандары алдағы уақытта қоршаған ортаға кері әсер ететін кәсіпорындарды бақылауды және заң бұзудың алдын алу шараларын жалғастыра береді.
