Шығыс Қазақстан облысы аумағындағы жолдарда тіркемесі бар көліктерге қойылған қысқы шектеулер алынды, деп хабарлайды F16.kz.
«ҚазАвтоЖол» ұлттық компаниясы баспасөз қызметінің мәліметінше, республикалық маңызы бар Өскемен-Алтай-Катонқарағай-Рахман қайнары автожолының 46-66 шақырымындағы (Северное ауылы мен Серебрянка қаласы аралығы) учаскесінде тіркемесі және жартылай тіркемесі бар көліктердің қозғалысына қыс мезгілінде енгізілген маусымдық шектеулер алынды. Аталған шектеулер жыл сайын күрделі жол учаскелеріндегі жол-көлік оқиғаларының алдын алу мақсатында енгізілген. Көктайғақ, боран және көріну деңгейі төмендегенде ірі көлемді көліктердің қозғалысы өте қауіпті. Осы маусымда шектеу 2025 жылғы қарашада енгізілген. Ауа райының жылы болуына және жол жағдайының жақсаруына байланысты биылғы 1 сәуірде шектеу алынды. Осы кезеңде жол қызметтері тәулік бойы жұмыс істеп, жолдарды қардан тазалау, көктайғаққа қарсы материал себу және автоколонналармен ілесіп жүру сияқты шараларды жүргізді.
