Шығыс Қазақстан облысы әкімдігінде Катонқарағай ауданын дамытуға арналған кеңес өтті. Жиынға өңір басшысы Нұрымбет Сақтағанов, Мәжіліс депутаты Ерлан Саиров және Aitas холдингінің өкілдері қатысты. Кездесу барысында аудан әкімдігі мен холдинг бірлесіп әзірлеген 2030 жылға дейінгі даму стратегиясы таныстырылды, деп хабарлайды F16.kz.
Облыс әкімі баспасөз қызметінің мәліметінше, бұған дейін Президент Қасым-Жомарт Тоқаев өңір басшылығына туризм саласын дамытуды жалғастыруды тапсырған. Ооблыс әкімдігі кәсіпкерлермен серіктестікті күшейтті.
Aitas Meken Foundation қорының атқарушы директоры Фатима Герфанова кейінгі жылдары Катонқарағайда көптеген ірі жоба қолға алынғанын атап өтті.
Кейінгі 7 жылда Катонқарағайда 100-ден астам жоба іске асырылды. Оның 75-і туризм саласына қатысты. Аудан әкімдігімен бірлескен жұмыстың арқасында қызмет көрсетілген туристер саны бес есе, бөлшек сауда көлемі екі есе, мектептердегі білім сапасы 20%-ға өсті. Енді Катонқарағайды дамытудың 2030 жылға дейінгі жоспары әзірленіп жатыр, — деді ол.
Жаңа стратегияның басты мақсаты – саналы туризм кластерін қалыптастырып, аудан экономикасының кемінде 50 пайызын өз кірісімен қамтамасыз ету. Құжатқа сәйкес, алдағы бес жылда халықаралық деңгейдегі екі қонақүй, екі музей, үш көпфункционалды сауда және туристік кешен, сондай-ақ ауыл шаруашылығы өнімдеріне арналған екі базар салу жоспарланып отыр.
Катонқарағай мен Өрел ауылдары негізгі тірек елді мекендер ретінде дамытылады. Бұл аумақтар толық инфрақұрылыммен қамтылып, үш мектеп пен екі балабақша бой көтермек. Сонымен қатар басқа ауылдарды да дамыту назардан тыс қалмайды.
Жоба аясында экология мәселесіне ерекше көңіл бөлінеді. Ауданға халықаралық Green Destination сертификатын алу жоспарланып отыр. Осылайша, Катонқарағай ел аумағында атмосфераға зиянды заттар бөлмейтін алғашқы ауданға айналуы ықтимал.
Мәжіліс депутаты Ерлан Саиров шекаралық аудандардың дамуы Президенттің тікелей бақылауында екенін айтты.
Шығыс Қазақстандағы шекаралық аудандар Президенттің тікелей шешімімен ашылған. Олардың дамуы Мемлекет басшысының жеке бақылауында. Егер Катонқарағайдағы осы жоба сәтті іске асырылса, бұл қалған аудандарға үлгі болады, — деді Ерлан Саиров.
Облыс әкімі ұсынылған құжат өңірдің 2030 жылға дейінгі даму жоспары аясында жан-жақты қаралатынын жеткізді. Сонымен қатар өңірде туризмді дамытуға арналған жеке жоспар әзірленіп жатқаны да айтылды.
Облысты дамыту мақсатында жұмыс істеуге ниет білдірген кәсіпкерлерге қолдау көрсетіп, барынша жағдай жасауымыз керек. Катонқарағай тек қазақстандық емес, шетелдік туристер көптеп келіп, таңғалып, айналасындағыларға жарнамалап айтатындай мекенге айналуға тиіс, — деді Нұрымбет Сақтағанов.
Жалпы, өңірде туризмді дамытуға бизнес өкілдері белсенді тартылуда. Aitas холдингі Катонқарағаймен қатар Ұлан және Шемонаиха аудандарында жұмыс істеуде көздеп отырса, басқа инвесторлар Риддер қаласы, Үлкен Нарын, Марқакөл және Күршім аудандарына қаржы құюға ниетті.
