Шығыс Қазақстан облысында онкологиялық аурулардан болатын өлім-жітім азайып келеді. Биылғы алғашқы тоқсанның қорытындысы өңірде онкологиялық қызмет жұмысы оң нәтиже беріп отырғанын көрсетті. Бұл туралы өңірлік коммуникациялар қызметі алаңында өткен брифингте ШҚО денсаулық сақтау басқармасының штаттан тыс бас онкологы Гүлмира Сағидуллина айтты. деп хабарлайды F16.kz.
Бас онкологтың айтуынша, онкологиялық аурулардан болатын өлім-жітім 100 мың тұрғынға шаққанда 103,3-тен 95,1-ге дейін төмендеп, 7,9 пайызға азайған. Бұл – саладағы жүйелі жұмыстардың нақты нәтижесі.
Қатерлі ісікті ерте анықтау көрсеткіші де біртіндеп жақсарып келеді. Қазір ол 34,4 пайызға жетті. Жалпы, ауруды ерте кезеңде анықтау – тиімді емнің және науқастың толық сауығып кетуінің басты кепілі, – деді Гүлмира Сағидуллина.
Бүгінде өңірдегі онкологиялық қызметтің негізгі бағыты – профилактика мен скринингтік тексерулерді күшейту. Бұл мақсатта халық арасында түсіндіру жұмысы тұрақты жүргізіліп, тегін тексерулер өткізіледі.
Соның бірі – ашық есік күні. Жыл басынан бері облыста осындай үш іс-шара өткізіліп, 2 850 адам дәрігерлік тексеруден өткен. Нәтижесінде 17 тұрғыннан қатерлі ісікке күдік анықталса, тағы 101 адамда обырға дейінгі өзгерістер тіркелген. Барлық азаматтарға қажетті медициналық кеңес беріліп, қосымша тексеруге жолдама берілді, – деп қосты бас онколог.
Дәрігердің айтуынша, онкологиялық аурулардың алдын алуда халықтың өз денсаулығына жауапкершілікпен қарауы да маңызды. Уақтылы тексеруден өтіп, алғашқы белгілерге мән беру – дертті асқындырмай анықтауға мүмкіндік береді.
Алдағы уақытта скринингтік бағдарламалар кеңейтіліп, ерте диагностиканы күшейту арқылы өңірдегі онкологиялық ахуалды жақсарту жұмысы жалғаса бермек.
