Шығыс Қазақстан облысының прокуратурасы кәмелетке толмаған балалардың құқығын қорғау және алимент өндіруге қатысты сот актілерінің орындалуын қамтамасыз ету бағытында жүйелі жұмыс жүргізіп келеді. Қадағалау органы бұл бағытта борышкерлерге қатысты мәжбүрлеу шараларын күшейтіп отыр, деп хабарлайды F16.kz.
Атап айтқанда, алимент төлеуден жалтарған азаматтарға Қазақстаннан шығуға шектеу қою, іздеу жариялау, сондай-ақ әкімшілік және қылмыстық жауапкершілікке тарту шаралары қолданылады.
Облыс прокуратурасының мәліметінше, жыл басынан бері 29 адам әкімшілік жауапқа тартылса, сегізі қылмыстық жаза арқалаған.
Сонымен қатар сот орындаушыларының қызметіне де тұрақты тексеру жүргізіліп тұрады. Қадағалау барысында алимент өндіру ісіне қатысты бірқатар заң бұзу дерегі анықталған. Соның ішінде үш кәмелетке толмаған баланың пайдасына жүргізілген атқарушылық өндірістердің бірінде сот орындаушысы берешекті ұзақ уақыт бойы дұрыс есепке алмағаны белгілі болды. Бұл жағдай қарыз туралы мәліметтің бұрмалануына әкелген.
Бұдан бөлек 2024 жылы өндірілген 300 мың теңге көлеміндегі қаражаттың ұзақ уақыт бойы алушыға аударылмай келгені анықталып, тек прокуратураның араласуынан кейін тиісті бағытқа жіберілген. Анықталған заң бұзу жағдайлары бойынша облыс прокуратурасы тәртіптік іс қозғап, нәтижесінде сот орындаушысы Қазақстан Республикасы Жеке сот орындаушыларының республикалық палатасы мүшелігінен шығарылды.
Қабылданған шаралардың нәтижесінде 328 баланың пайдасына жалпы сомасы 80 млн теңгеден астам алимент берешегі өтелген.
Осы орайда қадағалау органы ата-аналардың балаларды асырау жөніндегі міндеті заңмен бекітілгенін еске салып, алимент төлеуден жалтару әкімшілік және қылмыстық жауапқа әкелетінін ескертеді. ШҚО прокуратурасы балалардың құқығын қорғау бағытындағы жұмысты алдағы уақытта да тұрақты бақылауда ұстайды.
