Қазақстанда енді бөртегүл (сирень) бұтағын сындырған немесе жұлған азаматтарға 216 мың теңге көлемінде айыппұл салынуы мүмкін. Елде өсімдіктерге зиян келтіруге қатысты талаптар күшейтілді, деп хабарлайды F16.kz.
Енді қызғалдақпен бірге бөртегүлге зиян келтіргендер де әкімшілік жауапқа тартылады. Ішкі істер министрлігінің хабарлауынша, қоғамдық орындардағы ағаштар мен бұталарды заңсыз кесу, бүлдіру немесе зақымдау заң бұзу болып есептеледі. Бұл талап бөртегүлге де қатысты.
Қолданыстағы заңнамаға сәйкес, қала ішінде, тұрғын үйлердің ауласында, саябақтар мен көшелерде өсіп тұрған гүлдерді жұлуға немесе сындыруға тыйым салынған. Мұндай әрекет үшін 216 мың теңгеге дейін айыппұл қарастырылған.
Егер өсімдік жекеменшік аумақта өссе, жер иесі келтірілген шығынды өтеуді талап ете алады. Сонымен қатар моральдық зиян үшін де өтемақы сұрауға құқығы бар, оның мөлшері нақты шектелмеген.
Экология министрлігі де гүлдерді жұлу олардың табиғи таралуына кері әсер ететінін ескертеді.
