Қазақстанда жол қозғалысы ережесін бұзғандарды анықтайтын цифрлық бақылау жүйесі күшейтілді. Бұл туралы Ішкі істер министрлігі Әкімшілік полиция комитетінің аға инспекторы Ақтоты Боранова мәлімдеді, деп хабарлайды F16.kz.
Ведомтсов өкілінің айтуынша, бүгінде құқық бұзу жағдайларының бір бөлігі интеграцияланған ақпараттық жүйе мен мемлекеттік деректер базасы арқылы автоматты түрде анықталады. Бұл тәсіл адам факторын азайтып, заң бұзғандарды жедел тіркеуге мүмкіндік береді.
Жаңа жүйе іске қосылғалы бері республикада бірнеше мыңдаған құқық бұзудың жолы кесілген. Атап айтқанда, 5 мыңнан астам сақтандыру полисі жоқтығы анықталған. Сонымен қатар 5,5 мыңнан астам жүргізушінің техникалық байқаудан өтпегені белгілі болды. Қауіпсіздік белдігін тақпаған 700-ге жуық жүргізуші анықталса, көлік жүргізіп келе жатып ұялы телефон пайдаланған алты факті тіркелді.
Мамандардың айтуынша, цифрлық бақылау жүйесі жолдағы қауіпті әрекеттерді дер кезінде анықтауға, оқыс жағдайларды болдырмауға және жауапкершілікті қамтамасыз етуге бағытталған.
Ақтоты Боранова жүйенің басты мақсаты айыппұл салу емес, ең алдымен құқық бұзудың алдын алу және азаматтардың өмірі мен денсаулығын қорғау екенін атап өтті.
Жүргізушілерден заң талаптарына жауапты қарауды сұраймыз. Сақтандыру полисінің бар-жоғын алдын ала тексеріп, техникалық байқаудан уақтылы өтіп, жол қозғалысы ережелерін қатаң сақтау қажет, – деді ол.
