Ер адам танысынан заң жүзінде туындаған мәселелерін шешу үшін 200 мың теңге көлемінде ақша талап еткен, деп хабарлайды F16.kz.
Жәбірленуші талап етілген соманы уақытылы бере алмағандықтан ақша көлемін 400 000 теңгеге дейін арттырып, қысым жасай бастаған.
Жәбірленуші полицияға жүгінгеннен кейін, қылмыс фактісі құжатталып, ақшаның бір бөлігін беру барысында бақылау ұйымдастырылды. Күдікті ақшаны алу кезінде ШҚО ПД ҰҚҚКБ қызметкерлерімен ұсталды. Ұсталған азаматтың көлігі мен пәтерін жедел тінту барысында ақшалай қаражат және суық қару санатына жататын кастет тәркіленді, — дейді ШҚО ПД баспасөз қызметі.
Ер адамға қатысты үйқамақ түріндегі бұлтартпау шарасы таңдалды. Сотқа дейінгі тергеу амалдары жалғасып жатыр.
Жыл басынан бері Шығыс Қазақстан облысының аумағында 14 бопсалау дерегі тіркелген, оның 9-ы ШҚО ПД Ұйымдасқан қылмысқа қарсы күрес басқармасының қызметкерлерімен анықталған.
