Өскеменде ішкі істер органдары қызметкерлері арасында шайбалы хоккейден ішкі істер министрінің кубогына арналған республикалық турнир басталды. Жарыс ARLAN спорт клубының қолдауымен ұйымдастырылды, деп хабарлайды F16.kz.
Шығыстың бас қаласы осымен үшінші жыл қатарынан еліміздің түкпір-түкпірінен келген тәртіп сақшыларының басын қосып, дүбірлі хоккей бәсекесін өткізіп жатыр.
Кубок сарапқа салынатын байрақты бәсекеде сайдың тасындай іріктелнен алты команда бақ сынап жатыр. Олар: Астана қаласының, Қарағанды, Қостанай және Солтүстік Қазақстан облыстарының құрамалары, сондай-ақ ІІМ Күзет қызметін бақылау комитетінің командасы және турнир иелері — ШҚО полиция департаментінің ұжымы.
Ашылу салтанатында жас мәнерлеп сырғанаушылар өнер көсетіп, қалың жанкүйер мен қатысушыларды тәнті етті. №35 орта мектептің «Жас сақшы» сыныбының тәрбиеленушілері де айрықша атмосфера сыйлап, ұрпақтар сабақтастығының жарқын үлгісін көрсетті.
ШҚО полиция департаменті бастығының міндетін уақытша атқарушы, полиция полковнигі Болат Нұрсейітов сөз сөйлеп, спорт сайысының маңызына тоқталды.
Хоккей – бұл батыл, тәртіпті және тәуекелге бел байлай алатын жандардың ойыны. Нағыз полицейдің бойынан дәл осы қасиеттер табылуға тиіс. Атап айтсақ, командада жұмыс істей білу, қас-қағым сәтте шешім қабылдау және кез келген жағдайда өзіне сенімді болу. Бұл турнирге қатысудың өзі – үлкен жеңіс, себебі сіздер өз өңірлеріңіздің намысын қорғап келіп тұрсыздар, – деді ол.
Полиция қызметкерлеріне бұл тек спорттық бәсеке емес, сонымен бірге бірлік пен қызметтік борышқа адалдықтың нышаны.
Хоккейшілер үш күн бойы бәсекенің көрігін қыздырып, жанкүйерлерге қызықты сәттер мен тартысты ойын сыйлайды деген сенім мол. Дүбірлі жарыстың алғашқы ойындары бұл сөзімізді растай түскендей.
