Өскеменнің Самал саябағы маңындағы аспалы көпірдің құлауына байланысты полиция әкімшілік іс қозғады. Алдын ала мәлімет бойынша, оқиға кезінде көпір үстінде сегіз адам болған, деп хабарлайды F16.kz.
Шығыс Қазақстан облысы Полиция департаменті хабарлағандай, іс «Бөтеннің мүлкін қасақана жою немесе бүлдіру» бабы бойынша қаралып жатыр.
Оқиға 7 мамыр күні кешкі уақытта болған. Көпір шайқалған сәтте оның үстінде тұрған сегіз адамның алтауы суға құлаған. Зардап шеккен екі кәмелетке толмаған жасөспірім ауруханаға жеткізілді.
Қазір көпір аумағы қоршауға алынып, тұрғындардың кіруіне уақытша шектеу қойылған. Қала әкімдігі нысанды биыл жөндеуден өткізу жоспарланып отырғанын мәлімдеді.
