Биыл Үлкен Нарында аударыспақтан өткен Шығыс Қазақстан облысының чемпионаты көрерменге тартысты сәттер сыйлап, ұлттық спорттың мерейін үстем етті, деп хабарлайды F16.kz.
Аударыспақтан өткен додаға Самар, Марқакөл, Күршім және Ұлан аудандарынан келген жас палуандар қатысып, ұлттық спортқа жанашыр көрермен тартысты бәсекенің куәсі болды. Алаңға киіз үйлер тігіліп, сауда орындары ұйымдастырылды.
Мерекелік жиында Үлкен Нарын ауданының әкімі Елдос Байрахметов облыстық жарыстың ауданда алғаш рет ұйымдастырылуы өңір үшін айтулы оқиға екенін атап өтті.
Ауданда қазақ халқының төл спорты – аударыспақтан облыстық жарыс алғаш рет ұйымдастырылуда. Бұл – ауданымыз үшін маңызды тарихи сәт. Аударыспақ – ептілік пен күштің, батылдық пен төзімнің, намыс пен жігердің сыналар алаңы. Мұндай жарыстар жас ұрпақтың бойына ұлттық құндылықтарды сіңіріп, елдік рухты нығайта түседі, – деді ол.
Сөз соңында аудан әкімі жарысқа қатысушы спортшыларға сәттілік тілеп, ұлттық спорттың мерейі үстем, ел бірлігі берік болсын деген ізгі тілегін жеткізді.
Шара барысында Шығыс Қазақстан облысы дене шынықтыру және спорт басқармасының Ат спортының ұлттық түрлері бойынша балалар-жасөспірімдер спорт мектебінің басшысы Талап Садыбаев та сөз сөйлеп, жарысқа қатысушыларға сәттілік тіледі. Ол ұлттық ат спортының дамуына үлес қосу жас ұрпақ үшін маңызды өнеге екенін атап өтті.
Жарыс қорытындысы бойынша 52 келі салмақта Үлкен Нарын ауданының намысын қорғаған Әлбақан Ералым облыс чемпионы атанды. Жас спортшы Марқакөл мен Самардан келген палуандармен белдескен. Ал ақтық сында үлкеннарындық Құмар Ералымен күш сынасып, шешуші сәтте жеңісті жұлып алды.
Қазір Ералым Қарағандыда өтетін келесі жарысқа дайындық үстінде.
Жарыс барысында ерекше көзге түскен жас палуандардың қатарында Жанболат Сапарғали да бар. Ол бұл додада 74 және 81 келі салмақ дәрежелерінде бақ сынап, бір салмақта екінші, екіншісінде үшінші орын алды. Бас жүлде бұйырмаса да, Жанболаттың тартысты белдесуі көрермен назарынан тыс қалған жоқ. Әсіресе қарсыласына оңай беріле қоймай, соңына дейін қайсарлық танытқаны көпшіліктің ықыласын аударды.
