Ұлан ауданын дамытуға 2029 жылға дейін шамамен миллиардқа жуық қаржы бөлінді. Алдағы уақытта жеке инвестиция тарту жоспарланған. Бұл туралы Ұлан ауданы әкімінің орынбасары Рустам Садуақасов айтты, деп хабарлайды F16.kz.
Қазіргі уақытта өңір экономикасының негізгі тірегі – агроөнеркәсіп кешені. Мал шаруашылығы мен егін шаруашылығы да қарқынды дамып келеді. Жарты жыл ішінде ауданның барлық санаттағы шаруашылықтары 28 мың тонна ет, 818 мың дана жұмыртқа және 12 мың тонна сүт өндірген.
«КазРусСтек» ЖШС — 400 бас ірі қараға арналған, «Шарапат Агро» ЖШС — 300 бас, «СИБЕ» шаруа қожалығы — 400 бас болатын тауарлы-сүт фермаларын салу және қайта жаңарту жобаларын іске асыру жұмыстары жалғасуда. Жобаларды жүзеге асыру мерзімі – 2026–2028 жылдар, — деп атап өтті аудан әкімінің орынбасары.
Бұдан бөлек, халық табысын арттыру мақсатында «Ауыл Аманаты» жобасы аясында соңғы үш жылда Ұлан ауданының кәсіпкерлеріне 50 несие беріліп, жалпы сомасы 674,4 миллион теңгені құрады. Қаражат туризмді дамытуға, қайта өңдеуге, жабдықтар мен ауыл шаруашылығы техникасын сатып алуға бағытталды.
Ауыл шаруашылығы мақсатында пайдаланылмай жатқан жерлерді мемлекет меншігіне қайтару жұмыстары да жалғасуда. Жыл басынан бері 1000 гектар жер мемлекетке қайтарылды. Сонымен қатар Касым Қайсенов кенті маңында тауарларды сақтау және қоймалау үшін көлік-логистикалық орталық құру жобасы жүзеге асырыла бастады. Жобаның жалпы құны – 21 миллиард теңге, — деп атап өтті Рустам Садуақасов.
