Шығыс Қазақстан облысында «Нелегал» республикалық жедел-профилактикалық іс-шарасы басталды. Профилактикалық шараның алғашқы тәулігінде ШҚО ПД көші-қон қызметінің қызметкерлері 50-ден астам шетел азаматын әкімшілік жауапкершілікке тартты, деп хабарлайды F16.kz.
Операцияның негізгі мақсаты — шетел азаматтарының ел аумағында заң бұзу деректерін анықтау және заңсыз еңбек қызметінің жолын кесу.
Үлкен Нарын ауданында жүргізілген рейдтік іс-шаралар барысында уәкілетті органның рұқсатынсыз еңбек қызметін жүзеге асырған 8 шетел азаматы анықталды. Тексеру кезінде олардың екеуі бұған дейін де полиция назарына іліккені белгілі болды, — дейді ШҚО ПД баспасөз қызметі.
Қолданыстағы заңнамаға сәйкес, аталған азаматтарға Қазақстан Республикасына 5 жыл мерзімге кіруге тыйым салынған. Сонымен қатар шетелдік жұмысшыларды заңсыз жұмысқа қабылдаған жұмыс беруші де әкімшілік жауапкершілікке тартылып, мемлекет кірісіне айыппұл төлеуге міндеттелді.
Уақытша болатын шетел азаматтарының тиісті рұқсатсыз еңбек қызметімен айналысуына қатаң тыйым салынады. Жұмыс берушілерді қызметкерлерді жұмысқа қабылдау кезінде жауапкершілік танытып, көші-қон заңнамасының талаптарын қатаң сақтауға шақырамыз, — деді ШҚО ПД Көші-қон қызметі басқармасының бастығы Ринат Шкибаев.
ШҚО ПД жауапкершілік тек шетел азаматтарына ғана емес, оларға жұмыс ұсынған тұлғаларға да қарастырылғанын еске салады.
