21–27 маусым аралығында Ақмола облысының Щучинск қаласында Шоқан Уәлиханов атындағы Әскери колледждің «Амандық» оқу-жаттығу орталығында XII «Айбын-2026» халықаралық әскери-патриоттық жастар жиыны өтеді. Биыл айтулы додаға Қазақстанның барлық өңірлерінен іріктелген құрамалар, Қарулы Күштер мен өзге де күштік құрылымдардың әскери-патриоттық клубтары, әскери колледждер және мамандандырылған лицейлерден құралған 53 команда қатысады, деп хабарлайды F16.kz.
Сонымен қатар халықаралық деңгейдегі жарысқа Әзербайжан, Беларусь, Қырғызстан, Ресей және Өзбекстан мемлекеттерінің командалары да бақ сынамақ.
«Айбын-2026» бағдарламасы әскери-спорттық, зияткерлік және шығармашылық бағыттағы түрлі сайыстарды қамтиды. Қатысушылар әскери кросс пен эстафетада, «Күшіміз бірлікте» әскери-тактикалық ойынында, ату жарыстарында, АК-74 автоматын толық емес шашып-жинауда, белтемірге тартылуда, робототехника сайыстарында және «Айбын дарыны» зияткерлік байқауында өз шеберліктерін көрсетеді.
Шығыс Қазақстан облысының намысын облыстық «Айбын-2026» жарысында үздік нәтиже көрсеткен сарбаздардан құралған «Сұңқар» командасы қорғайды. Команда құрамында 15 жас сарбаз бар, оның ішінде 5 қыз және 10 ұл. Құрамаға Күршім ауданынан – 4, Алтай ауданынан – 6, Тарбағатай ауданынан – 2 және Ұлан ауданынан 3 қатысушы кірген.
«Айбын» әскери-патриоттық жастар жиыны – жас ұрпақтың бойында отансүйгіштік қасиетті қалыптастырып, әскери қызметке деген қызығушылықты арттыратын маңызды жоба. Биылғы жарысқа Шығыс Қазақстан облысының намысын қорғайтын «Сұңқар» командасы үздіктер қатарынан іріктеліп, тыңғылықты дайындық жүргізуде. Команда құрамындағы әрбір жас сарбаздың жеңіске деген жігері мен жауапкершілігі жоғары. Біз олардың халықаралық деңгейдегі додада өздерінің білімін, дайындығын және рухын лайықты деңгейде көрсететініне сенімдіміз. Жас өрендерімізге сәттілік тілеп, ел намысын абыроймен қорғап қайтуына тілектеспіз, – деді «Жас Сарбаз» балалар мен жасөспірімдердің әскери-патриоттық қозғалысы» РҚБ Шығыс Қазақстан облыстық филиалының төрағасы Дәурен Шоматов.
Қазіргі уақытта «Сұңқар» командасының мүшелері Алтай қаласындағы Сағадат Нұрмағамбетов атындағы мектеп базасында оқу-жаттығу жиындарын өткізіп, халықаралық жарысқа жан-жақты дайындық жүргізіп жатыр.
