25 маусымда Қазақстан Республикасы Бас прокуратурасының жанындағы Құқық қорғау органдары академиясында экономикалық тергеу қызметі үшін алғашқы кәсіптік даярлық бағдарламаларын аяқтаған тыңдаушылардың салтанатты шығарылымы өтті.
Алты ай бойы болашақ қызметкерлер экономикалық қылмыстарға қарсы іс-қимыл саласындағы арнайы пәндерді меңгеріп, теориялық білімдерін практикалық қызметпен ұштастырды.
Салтанатты рәсімге Академия ректоры Нұрғалым Әбдіров, Қаржылық мониторинг агенттігі Төрағасының орынбасары Жеңіс Елемесов, Академияның профессорлық-оқытушылар құрамы және түлектердің ата-аналары қатысты.
Іс-шара барысында 10 тыңдаушы Академияның қоғамдық өміріне белсенді қатысқаны үшін грамоталармен марапатталды. Салтанатты шараның ерекше сәті Қаржылық мониторинг агенттігі төрағасы орынбасарының оқуын үздік аяқтаған тыңдаушыларға алғашқы офицерлік атақ беруі болды. Бұл маңызды кезең олардың экономикалық тергеу органдарында кәсіби қызметінің басталуы болды.
Түлектерге арнаған сөзінде басшылар олардың даярлық деңгейінің жоғары екенін атап өтіп, заңға адал қызмет етудің маңыздылығына тоқталды. Сондай-ақ жас мамандардың қалыптасуына қосқан үлестері үшін профессорлық-оқытушылар құрам мен ата-аналарға алғыс білдірді.
Оқу қорытындысы бойынша түлектерге дипломдар табысталды. Алдағы уақытта олар экономикалық тергеу органдарының аумақтық бөлімшелерінде қызметтерін жалғастырып, алған білімдері мен кәсіби дағдыларын іс жүзінде қолданатын болады.
