27 маусым күні Шығыс Қазақстан облысының бірқатар аумағында күн райы бұзылады, деп хабарлайды F16.kz сайты «Қазгидромет» РМК Шығыс Қазақстан филиалыныңа сілтеме жасап.
Синоптиктердің мәліметінше, түнде облыстың шығыс бөлігінде жаңбыр жауып, найзағай ойнайды. Күндіз облыстың солтүстігінде, шығысында және оңтүстігінде өткінші жаңбыр, найзағай, кей жерлерде бұршақ жаууы ықтимал. Сонымен қатар түнде облыстың солтүстігінде тұман түседі деп болжануда.
Жел солтүстік-батыстан және солтүстіктен соғады. Күндіз оның екпіні облыстың солтүстігінде, шығысында және оңтүстігінде секундына 15–20 метрге дейін жетуі мүмкін.
Мамандардың айтуынша, облыс аумағында жоғары өрт қаупі сақталады. Ал облыстың солтүстік-батысы мен орталығында, сондай-ақ Өскемен қаласында төтенше өрт қаупі жарияланған.
Осыған байланысты тұрғындарға қауіпсіздік шараларын қатаң сақтау ұсынылады. Найзағай кезінде үйде болып, терезе мен есіктерді жабу, электр құрылғыларын желіден ажырату қажет. Сондай-ақ металл қоршаулардың, электр өткізетін конструкциялардың маңында тұрмау керек.
Өрт қаупінің жоғары болуына байланысты құрғақ шөп пен қамысты өртеуге, тұрғын үйлердің маңында от жағуға болмайды. Автокөліктен сөндірілмеген темекі тұқылын немесе шыны қалдықтарын тастамау да маңызды.
Егер белгілі бір аумақта ерекше өртке қарсы режим енгізілсе, ол алынғанға дейін орманға баруға қатаң тыйым салынады.
Қатты жел кезінде электр сымдарына және тербеліп тұрған заттарға жақындамауға, ағаштардың астына немесе аялдама қалқаларының артына паналамауға кеңес беріледі.
Төтенше жағдай туындаған жағдайда тұрғындардан «112» бірыңғай құтқару қызметіне хабарласу сұралады.
