Қазақстан Республикасында мемлекеттік тілдің қолданыс аясын кеңейтуге және бұқаралық ақпарат құралдарында қазақ тілін насихаттауға үлес қосып жүрген журналистер мен медиа саласының өкілдері «Мемлекеттік тіл және БАҚ» республикалық конкурсына қатыса алады, деп хабарлайды F16.kz сайты.
Байқаудың ұйымдастырушысы – Қазақстан Республикасы Ғылым және жоғары білім министрлігінің Тіл саясаты комитеті.
Конкурстың негізгі мақсаты – бұқаралық ақпарат құралдарында мемлекеттік тілді кеңінен насихаттау, мемлекеттік тіл саясатын ілгерілету, сондай-ақ қазақ тіліндегі сапалы журналистиканы қолдау және үздік шығармашылық жұмыстарды анықтау.
Байқау аясында мемлекеттік тілдің дамуы мен насихатына арналған телевизиялық және радиобағдарламалар, мерзімді баспасөз материалдары, интернет-басылымдардағы жарияланымдар, сондай-ақ әлеуметтік желілердегі медиажобалар қабылданады.
Конкурсқа кәсіби журналистер, телевизия және радио, газет, сайт ұжымдары, сондай-ақ мемлекеттік тіл мәселелерін тұрақты көтеріп жүрген журналист-мамандар қатыса алады. Байқауға соңғы үш жылда бірінші орын алған жүлдегерлер қатыстырылмайды.
Қатысу үшін өтінімдер 2026 жылғы 1 шілде сағат 24.00-ге дейін til.jane.baq@gmail.com электронды поштасына «Мемлекеттік тіл және БАҚ» республикалық байқауына» деген белгімен жолдануы тиіс.
Өтінімге төмендегі материалдар қоса ұсынылады:
– белгіленген үлгі бойынша толтырылған өтінім;
– 2026 жылғы 1 қаңтар мен 1 шілде аралығында жарияланған екі мақала немесе бір теле/радиобағдарлама;
– жарияланған материалдардың электрондық нұсқалары, скриншоттары немесе теле-, радиобағдарламалардың жазбалары.
Конкурстық жұмыстардың тақырыпқа сәйкестігі, ақпараттың өзектілігі мен нақтылығы, мәселені талдау тереңдігі және материалды жеткізу шеберлігі бойынша бағаланады.
Байқау екі номинация бойынша өтеді:
– «Үздік мақала»;
– «Үздік теле/радиобағдарлама».
Жеңімпаздар арнайы дипломдармен, алғысхаттармен және қаржылай сыйлықтармен марапатталады.
Қосымша ақпаратты 8-777-114-66-83 байланыс телефоны арқылы алуға болады.
Мемлекеттік тілдің дамуына өз үлесіңізді қосып, үздік шығармашылық жұмыстарыңызды ұсынуға шақырамыз!
