Шығыс Қазақстан облысында жыл басынан бері 450-ден астам адамның Қазақстан Республикасы азаматтығынан бас тартқан. Олардың басым бөлігі көрші мемлекеттің азаматтығын алған, деп хабарлайды F16.kz.
Заңнама талаптарын бұзғаны үшін 31 адам әкімшілік жауапкершілікке тартылды. Оның ішінде 24 азамат шетелдік азаматтықты алғаны туралы уақтылы хабарламаған, ал 7 адам азаматтықтан бас тартқаннан кейін Қазақстан Республикасының құжаттарын заңсыз пайдаланған. Сот шешімімен 6 шетелдік азамат ел аумағынан шығарылды, — дейді ШҚО ПД баспасөз қызметі.
Мәселен, облыс орталығының 43 жастағы тұрғыны 2024 жылдың қазан айында өзге мемлекеттің азаматтығын алғанымен, заңда белгіленген мерзімде ішкі істер органдарына хабарламаған. Оның қазақстандық құжаттары тәркіленіп, азаматтығынан айырылды.
ШҚО Полиция департаменті өзге мемлекеттің азаматтығын алған жағдайда, азаматтар 30 күн ішінде бұл туралы ішкі істер органдарына хабарлап, Қазақстан Республикасының азаматтығын куәландыратын құжаттарды тапсыруға міндетті екенін ескертеді. Бұл талапты бұзғандарға әкімшілік жауапкершілік қарастырылған.
