2026 жылдың бірінші жартыжылдығында Қазақстан Республикасы Мемлекеттік қызмет істері агенттігінің Шығыс Қазақстан облысы бойынша департаменті мемлекеттік көрсетілетін қызметтердің сапасы мен қолжетімділігін арттыру, заңнама талаптарының сақталуын бақылауды күшейту және көрсетілетін қызметті алушылардың құқықтарын қорғау бағытында ауқымды жұмыстар жүргізді.
Қазіргі уақытта Шығыс Қазақстан облысының аумағында мемлекеттік көрсетілетін қызметтердің 427 түрі көрсетіледі. Оның ішінде 233 қызметті орталық мемлекеттік органдардың аумақтық бөлімшелері, ал 194 қызметті жергілікті атқарушы органдар ұсынады.
2026 жылдың алғашқы алты айында облыс тұрғындарына 4 726 200 мемлекеттік қызмет көрсетілді. Оның 4 606 247-сі немесе жалпы көлемнің 97,4 пайызы электрондық форматта ұсынылды. Бұл көрсеткіштер цифрлық сервистерге деген сұраныстың жоғары екенін және электрондық үкімет жүйесінің табысты дамып келе жатқанын айғақтайды.
Департамент мемлекеттік көрсетілетін қызметтер саласындағы заңнаманың сақталуына ерекше көңіл бөледі. Есепті кезеңде барлығы 15 бақылау іс-шарасы өткізілді. Оның ішінде сегізі – жоспарлы тексеру, төртеуі – жеке және заңды тұлғалардың өтініштері негізінде жүргізілген тексерулер, үшеуі – ішкі бақылау қызметтерімен бірлескен тексерулер.
Тексеру қорытындысы бойынша анықталған бұзушылықтарды жою жөнінде 36 ұсынымды қамтитын 10 ұсыну енгізілді. Барлық ұсынымдар толық көлемде орындалды.
Жалпы бақылау іс-шараларының нәтижесінде 7 195 заң бұзушылық анықталды. Оның ішінде 2 014 бұзушылық орталық мемлекеттік органдардың аумақтық бөлімшелерінде, ал 5 181 бұзушылық жергілікті атқарушы органдарда тіркелді.
Есепті кезеңде мемлекеттік қызмет көрсету сапасына қатысты Департаментке азаматтардан 306 өтініш келіп түсті. Қабылданған шаралардың нәтижесінде 68 көрсетілетін қызметті алушының құқықтары қалпына келтірілді.
Мәселен, Департаментке жеке қосалқы шаруашылық жүргізу үшін жер учаскелерін беруден жер комиссиясының қорытындысы негізінде бас тартылған азаматтардан шағымдар келіп түсті. Тексеру барысында мемлекеттік көрсетілетін қызметті ұсыну рәсімінде елеулі заң бұзушылықтар анықталды. Атап айтқанда, аудандық жер комиссиясының қажетті кворумы болмағанына қарамастан, жер учаскелерін беру мүмкін еместігі туралы қорытындылар қабылданған.
Департаменттің жедел әрекет етуінің нәтижесінде азаматтардың құқықтары қалпына келтірілді. Аудан әкімінің атына өтініштерді заңнама талаптарына сәйкес қайта қарау қажеттігі туралы хат жолданды.
Бақылау іс-шараларының қорытындысы бойынша мемлекеттік органдардың 14 лауазымды тұлғасы тәртіптік жауапкершілікке тартылды. Сонымен қатар рұқсат беру құжаттарын беру мерзімдері мен тәртібін бұзғаны үшін 11 әкімшілік құқық бұзушылық туралы хаттама толтырылды.
Бақылау қызметімен қатар Департамент мемлекеттік көрсетілетін қызметтердің сапасын арттыруға және халықтың құқықтық сауаттылығын көтеруге бағытталған профилактикалық жұмыстарды да жүйелі түрде жүзеге асыруда.
Алты ай ішінде мемлекеттік қызмет көрсету сапасын арттыру және тұрғындарды ақпараттандыру мақсатында семинарлар, дәрістер, дөңгелек үстелдер, брифингтер мен жәрмеңкелерді қамтитын 115 ақпараттық-түсіндіру іс-шарасы ұйымдастырылды.
Бизнес-процестерді талдау нәтижесінде мемлекеттік көрсетілетін қызметтер жүйесін одан әрі жетілдіруге бағытталған 21 бастамашыл ұсыныс әзірленді.
Жүргізіліп жатқан жұмыстар мемлекеттік басқарудың тиімділігін арттыруға, әкімшілік рәсімдердің ашықтығын қамтамасыз етуге және азаматтардың құқықтарын қорғауға бағытталған. Цифрлық сервистерді жүйелі дамыту, бақылау және профилактикалық жұмыстарды күшейту мемлекеттік көрсетілетін қызметтердің сапасын арттырып, халықтың мемлекеттік институттарға деген сенімін нығайтуға ықпал етеді.
Айқымбеков Е.М,
Қазақстан Республикасы Мемлекеттік қызмет істері агенттігінің
Шығыс Қазақстан облысы бойынша департаментінің басшысы.
