Шығыстың бас шаһарында осыдан 25 жыл бұрын құрылып, қазақтың күй өнері мен асыл мұрасын насихаттап, ұлттық руханиятын ұлықтап, өңірдің мәдениет саласына үлесін қосып жүрген Байжігіт атындағы қазақ халық ұлт аспаптары оркестрінің мерейтойы өтті, деп хабарлайды F16.kz.
Сәрсенбінің сәтті кешінде облыстық филармонияның үлкен залына асыққан қонақтар қарасы көп болды. Барлығы жергілікті өнерпаздардың өнеріне сусындап, мерейтоймен құттықтауға келген өнерсүйер көрермен.
Кешке Шығыс Қазақстан облысының әкімі Нұрымбет Сақтағанов келіп, өнер ұжымын айтулы белесімен құттықтады.
Қазақ үшін күй – жай ғана әуен емес, ұлттың жадында сақталған тарих, бабалардан жеткен аманат, халықтың қуанышы мен мұңын, арман-мұратын жеткізген қасиетті өнер. Сол өнердің алтын арқауын үзбей, ұрпақтан ұрпаққа жалғап келе жатқан оркестрдің ширек ғасырлық шығармашылық жолы – ұлттық руханиятымыздың шежірелі белесі. Оркестр талай сахнаның төрінен көрініп, республикалық және халықаралық өнер додаларында кәсіби шеберлігімен танылды. Шығыс Қазақстанның мәдени мәртебесін биіктетуге қосқан өлшеусіз үлестеріңіз үшін баршаңызға шынайы алғысымды білдіремін! Мерейтой құтты болсын! – деді аймақ басшысы.
Нұрымбет Сақтағанов оркестр ұжымына 20 миллион теңгенің сертификаты мен Алғыс хаттар табыс етті.

Сондай-ақ мерекелік шарада Қырғыз Республикасының халық әртісі Бақыт Тілегенов, Қазақстанның еңбек сіңірген қайраткерлері Дәурен Ғылымов пен Нұржан Бажекенов, Моңғолияның мәдениет саласының өкілі Тұрар Ерболұлы және өзге де өнер майталмандары өнер көрсетті.
Бүгін Өскемен шаһарында үлкен той, үлкен мереке. Оның басты себепкері – Байжігіт оркестрі. Әріптестерімізді осы қуанышпен құттықтап, қолдау көрсету үшін Қырғызстаннан арнайы келдім. Өткен жылы Өскеменге алғаш рет келгенде осы оркестрімен таныстым. Дирижер ретінде өнеріне, жұмысына жоғары баға берер едім. Тек өңір арасында емес, халықаралық деңгейде танылатын мүмкіншілігін көремін. «Қырғыз-қазақ бір туған» дейміз ғой. Сондықтан бір туған бауырларымызға үнемі сәттілік тілейміз, – деді Қырғыз Республикасының халық әртісі Бақыт Тілегенов.
Сондай-ақ сахнада «An.Sal.Dar» тобы, Қазақстанның еңбек сіңірген әртісі Вячеслав Ткач, Нұргүл Қабдоллаева, Ботагөз Жұмабекова, Арника Байбусынова және жас орындаушылар өнерлерін ортаға салды.
25 жыл – шығармашылық ұжым үшін үлкен белес. Осы уақыт ішінде Байжігіт оркестрі ұлттық өнерді ұлықтап қана қоймай, қазақ музыкасының бай мұрасын кейінгі ұрпаққа жеткізуге өз үлесін қосып келеді. Мерейтойлық кеш те осы сабақтастықтың жарқын көрінісі.
Суреттер: Аяужан Утеулинова




