А.С.Пушкин атындағы Шығыс Қазақстан облысының кітапханасында «Оқитын ұлт – кітап оқудың жаңа дәуірі» атты әдеби-талқы ұйымдастырылды.
Ұйымдастырушылардың айтуынша, іс-шараның басты мақсаты – қоғамда кітап оқу мәдениетін қалыптастыру, оқырмандар қызығушылығын арттыру және кітаптың адам өміріндегі рухани әрі танымдық маңызын насихаттау.
Кездесу барысында оқырмандар әлем және қазақ әдебиетінің көрнекті еңбектерін талқылап, интерактивті әңгіме өрбітті. Әдеби талқының көркемдік мазмұнын «Самға» жастар театрының актерлері толықтырып, Абай Құнанбайұлының «Болыс болдым, мінеки» өлеңінің желісімен сахналық қойылым ұсынды.
Кездесудің маңызды бөлігі Республикалық «Кітап оқитын ұлт» кітап оқу марафонына арналды. Марафонға қатысушылар – Сәуле Манарбекқызы мен Әсем Аманбекқызы, Томирис Ермекқызы өздерінің оқырмандық тәжірибесімен бөлісіп, кітап оқуға деген қызығушылықтарының қалай қалыптасқанын, марафонның өмірлеріне әкелген өзгерістерін әңгімеледі. Сондай-ақ кітап таңдаудың жолдары, оқуға уақыт табу, жастарды кітапқа баулу және оқу мәдениетін күнделікті өмір салтына айналдыру мәселелері талқыланды.
Іс-шара соңында «Кітап оқуға неге уақыт таппаймыз?» тақырыбында шағын дәріс ұсынылып, кітап оқуға уақыт табудың тиімді жолдары мен пайдалы кеңестер айтылды.




