Пушкин атындағы ШҚО кітапханасында «Қуатты елдің жастары – кітаппен» атты пікірталас алаңы өтті, деп хабарлайды F16.kz тілшісі.
Биыл елімізде алғаш рет 23 сәуір – Ұлттық кітап күні аталып өтті. Жаңа мереке былтыр Атырауда өткен Ұлттық құрылтайда Мемлекет басшысы Қасым-Жомар Тоқаевтың тапсырмасына сәйкес белгіленген. Атаулы күнге орай қаладағы «Төр Алтайдың әдеби әлемі», «Кітаппен өскен мен», «Кітап ал» әдеби-шығармашылық топтарынан белсенді, кітапсүйер жастары пікірталас алаңын өткізді.
Шараның шымылдығын қаламыздағы белгілі балалар жазушысы Күлмай Сембайқызы ашып, кітап оқудың пайдасы, кітаптың маңыздылығы туралы айтты. Аmanat партиясының Жастар рухы жастар қанатының Шығыс Қазақстан облыстық төрағасы Қорлан Туғамбаева сөз сөйледі.
Шара барысында жергілікті жас қаламгерлер және кітапсүйер жастар Қ.Дүргінбайұлы, С.Қуанғанұлы, Ә.Әуезхан, Р.Асқарұлы, А.Досханұлы өздерінің өлеңдерін оқып, оқыған кітаптары жайында ой бөлісті. Отбасымен кітап оқитын кітапхананың белсенді оқырмандары Шыңғыс Манарбекұлы мен Шырын Ардаққызы баланы кітап оқуға қалай қызықтыруға болатынын айтты.
Шарада ән шырқалып, жиылған көпшілік викториналық сұрақтарға жауап берді. Шара қонақтарына сый ретінде кітаптар тарту етілді.
Фото: Пушкин атындағы облыстық кітапхана
