Елімізде 2023 жылдың 3 наурызынан бастап халықтың қарыздық жүктемесін азайтуға бағытталған «ҚР азаматтарының төлем қабілеттілігін қалпына келтіру және банкроттығы туралы» заң күшіне енген. Оның Шығыс Қазақстан облысында іске асырылу барысы туралы облыстық мемлекеттік кірістер департаменті басшысының орынбасары Қазыбек Қойшинов айтып берді, деп хабарлайды F16.kz тілшісі.
Заңда үш түрлі рәсім қарастырылған:
Соттан тыс банкроттық – қарыз мөлшері 1 600 АЕК-ке дейін болған жағдайда, 12 ай ішінде төлем жүргізілмесе және тіркелген мүлік болмаған кезде қолданылады. Өтініштер Egov порталы немесе ХҚКО арқылы беріледі. Рәсім алты айға дейін созылады.
Сот банкроттығы – қарыз мөлшері 1 600 АЕК-тен асқан жағдайда жүргізіледі. Бұл рәсім қаржы басқарушысының қатысуымен өтеді. Жалғыз баспана кепілде болмаса, азаматтың өзінде қалады.
Төлем қабілеттілігін қалпына келтіру – банкрот деп танылмай, қарыздарды бес жылға дейін бөліп төлеуді көздейді.
Айта кету керек, банкрот деп танылған азаматтар бес жыл ішінде жаңа несие рәсімдей алмайды. Қайта банкроттық рәсім тек жеті жылдан кейін мүмкін болады. Сонымен қатар алимент, денсаулыққа келтірілген зиянды өтеу және қылмыстық айыппұлдар бойынша міндеттемелер жойылмайды.
Кеңес алу үшін өңір тұрғындары Өскемен қаласы, Пермитин көшесі, 27үй, мекенжайында, 108кабинет МКД-ға жүгіне алады немесе 8 (7232) 70-15-58, 24-25-62 телефондары арқылы хабарласа алады.
Фото: F16.kz
