ШҚО әкімі Нұрымбет Сақтағанов жұмыс сапарымен Алтай ауданына барып, Бұқтырма өзені деңгейінің көтерілуіне байланысты атқарылып жатқан қауіпсіздік жұмыстарын тексерді.
Кейінгі екі күн бойы жауған жаңбырдан таудағы қар жылдам еріп, Бұқтарма өзені арнасынан асты.
Сонымен қатар Зубовка кентінде жерасты суының көтерілуінен және Поганка өзеніндегі бөгеттің ішінара дренаж салдарынан адамдар тұрып жатқан 10 үйдің және бос тұрған 3 үйдің ауласына су кірді.
ШҚО ТЖД күштері жедел қимылдап, аулалардан 4250 текше метр су сорып шығарып, 2000 дана қап төседі. Құтқарушылар мен жергілікті атқарушы органдардың жедел және үйлесімді әрекетінің арқасында тұрғын үйлерге су кірген жоқ.
Бөгетті бекіту үшін 980 тонна тас-топырақ төгіліп, 2000 дана қап дайындалдв, дренаж учаскелерінде бөгеттің ішкі бетіне ұзындығы 60 метр полиэтилен үлдір төселді.
1 мамырда Зубовка кентінің аумағы ҰҰА көмегімен толық тексеріліп, нәтижесінде бөгетті бекіту жұмыстары жүргізілді. Оқиға орнында жедел штаб жұмыс істеп жатыр. Облыс әкімі жағдайды қатаң бақылауда ұстауды тапсырды. Барлық жауапты қызметтер кез келген қауіптің алдын алу үшін үйлесімді және жедел жұмыс істеуі қажет.
Су деңгейі тәулік бойы тексеріліп, бақылауға алынған. Жедел мәліметтерге сәйкес, тұрғын үйлерге су басу қаупі болмағандықтан, адамдарды эвакуациялау қажеттігі туындаған жоқ. Бұқтарма өзеніндегі су деңгейі 73 см-ге төмендеп, қазір 535 см болды. Тұрғын үйлерге қауіп төніп тұрған жоқ.
Су тасқыны жағдайы өңірлік штабтың тұрақты бақылауында.
