Төтенше жағдайлар министрлігі (ТЖМ) ауылдық елді мекендердегі қауіпсіздік деңгейін арттыру бойынша кешенді жұмыстарды жүзеге асырып жатыр. Осы мақсатта ел көлемінде «Ауыл құтқарушылары» атты маңызды бағдарлама іске қосылды, деп хабарлайды F16.kz.
Жобаның негізгі бағыты – шалғайдағы ауыл тұрғындарының өрттен қорғану мүмкіндігін арттыру және жедел көмек көрсету жүйесін қалыптастыру.
Бұл бастама ТЖМ министрі, генерал-майор Шыңғыс Әріновтің басым жобаларының бірі ретінде жүзеге асырылып жатыр. Оның айтуынша, ауыл тұрғындары қалалықтармен бірдей қорғалуға тиіс, ал еріктілер жергілікті ден қою жүйесінің маңызды элементіне айналуы қажет.
Бағдарламаның негізгі мақсаты мен міндеттері:
· Шалғай ауылдарда жедел көмек көрсету жүйесін дамыту;
· Ерікті өртке қарсы бекеттер мен құрылымдар құру;
· Жергілікті әкімдіктерге өрт сөндіру техникасы мен құрал-жабдықтарын беру;
· Еріктілерге киім-кешек, техника және қажетті инфрақұрылыммен қамтамасыз ету;
· Бірыңғай визуалды сәйкестендіру жүйесін енгізу.
2024 жылдың басынан бері Абай, Алматы, Қарағанды, Солтүстік Қазақстан және Шығыс Қазақстан облыстарындағы мемлекеттік өрт қызметі жоқ ауылдарда бес жаңа ерікті бекеті ашылды. Барлық бекеттер заманауи техникамен, қажетті жабдықтармен және арнайы киіммен жабдықталды.
Жыл соңына дейін ел бойынша 40 жаңа бекет пен жергілікті атқарушы органдардың бөлімшелері құрылмақ. Бұл үшін министрлік 150 өрт техникасын бөлуді жоспарлап отыр. Бұған қоса, қазір жұмыс істеп тұрған 34 бекет кезең-кезеңімен жаңартылады.
ЖҮЙЕЛІ КӨЗҚАРАС – ҚАУІПСІЗ БОЛАШАҚ КЕПІЛІ
«Ауыл құтқарушылары» жобасы арқылы ТЖМ тек қауіпсіздікті ғана емес, сонымен қатар ауыл тұрғындарының төтенше жағдайларға дер кезінде әрекет ету дағдысын қалыптастыруға, азаматтардың мемлекетке деген сенімін нығайтуға және еріктілік мәдениетін дамытуға ерекше мән беріп отыр.
Бұл бағдарлама – ауыл тұрғындарының өмір сапасын арттыру мен қауіпсіз қоғам құру жолындағы маңызды қадам.
Фото: ШҚО өңірлік коммуникация қызметі
