А.С.Пушкин атындағы облыстық кітапханада Ұлы Жеңістің 80 жылдығына орай соғыс ардагерлері ұйымының мүшелерінің қатысуымен патриоттық ерлік сабағы өтті, деп хабарлайды F16.kz тілшісі.
Шараға «Германиядағы Кеңес әскерінің тобы мен Варшава келісім шарты әскерінің тобының» құрамында болған жерлес ардагерлер мен мектеп оқушылары, жастар, кітапхана оқырмандары қатысты.
«Германиядағы Кеңес әскерінің тобы мен Варшава келісім шарты әскерінің тобы» 1945 жылы 10 маусымда құрылып, оған 1-Белорусь, 2-Белорусь және 1-Украин майдандары әскерлерінің құрамалары енген. Олардың алдына қойылған маңызды міндет – басып алынған аймақты басқару және КСРО-ның батыс шекарасын сыртқы қауіп-қатерден қорғау еді.
Уақыт өте келе ГДР аумағында орналасқан КСРО Қарулы Күштері КСРО-ның Батыстағы мемлекеттік шекарасын бірінші кезекте қорғайтын құрам болып есептелді. Топтың жеке зауыттары, инфрақұрылымдық нысандары, қосалқы учаскелері, офицер мектебі, пионер лагерьлері, санаторийлер, сауда желісі, офицер үйлері, теледидар орталықтары, тұрмыстық қызмет көрсету кешендері, клубтар, әскери ән және би ансамбльдері, өз драма театры болды.
Германиядағы Кеңес Әскери күштері тобы Германия мемлекетінен ресми түрде 1994 жылдың 31 тамызы күні түпкілікті шығарылды.
Ерлік сағатының барысында патриоттық мазмұндағы материалдар көрсетілді, сұрақ-жауап, өзара пікір алмасу ұйымдастырылды.
Фото: А.С.Пушкин атындағы облыстық кітапхана
