Жыл соңына дейін елімізде 130-дан аса гидротехникалық нысан көпфакторлы тексерістен өтеді, деп хабарлайды F16.kzтілшісі ҚР Су ресурстары және ирригация министрлігіне сілтеме жасап.
Министрлік таратқан ақпаратқа сүйенсек, 2028 жылдың соңына дейін 557 нысанға тексеріс жүргізіледі.
Көпфакторлы тексеріс нысанның және ондағы жабдықтардың техникалық жағдайын, сондай-ақ қажет болатын жөндеу жұмыстарының көлемі мен түрлерін анықтауға мүмкіндік береді.
Былтыр министрлік еліміздің 14 облысындағы 84 нысанда көпфакторлы тексеру жұмыстарын жүргізген болатын. Бұл бастапқыда жоспарланғаннан көп.
Жаңа Су кодексіне сәйкес, гидротехникалық нысандардың иелері әр бес жыл сайын өздеріне тиесілі құрылыстарға көпфакторлы тексеру жүргізуге міндетті. Тексеріс нәтижесінде қауіпсіздік декларациясы жасалып, ол бассейндік су инспекциясында тіркелуі қажет, – деді Су ресурстары және ирригация вице-министрі Ерболат Ибрайханов.
Фото: t.me/QR_Su_resurstsri_ministrligi
