Биыл Шемонаиха ауданында қоқыс өңдеу зауытының құрылысы басталмақ. Бұл туралы облыстық Табиғи ресурстар және табиғат пайдалануды реттеу басқармасы басшысының орынбасары Еламан Мұхтарханов мәлім етті, деп хабарлайды F16.kz тілшісі.
Жоспар бойынша жаңа өндіріс орны жылына 36 мың тонна пластик қалдықтарын қайта өңдеуге қауқарлы болады.
Белгілі болғандай, аталмыш жоба екі бағытта жүзеге асырылады. Атап айтсақ, қоқыс жәшіктері, люктер, орындықтар сынды тұрмыстық бұйымдар шығару, сондай-ақ, пластикті қайта өңдеу арқылы дизель отыны мен битум тәрізді биожанармай өндіру. Осы ретте, жобаға құйылатын инвестиция көлемі 1,7 миллиард теңгеге жететінін де айту керек.
Еске салайық, былтыр елімізде Үкіметтің тапсырмасы бойынша қоқысты қайта өңдеу саласын дамыту мақсатына «Жасыл Даму» АҚ арқылы 200 миллиард теңге бөлінген болатын. Республика бойынша барлығы 96 жоба іріктелген. Оның бірі – жоғарыда айтылған Шемонаихадағы зауыттың жобасы.
Нұржан Кенжеұлы
Фото: ШҚО өңірлік коммуникациялар қызметі
