Ішкі істер вице-министрі Игорь Лепеха балаларға қарсы жыныстық зорлық көрсеткендерге бақылау күшейетінін айтты. Бұл туралы ол БАҚ өкілдеріне Мәжіліс қабырғасында мәлім етті, деп хабарлайды F16.kz.
Бас бостандығынан айыру орындарынан босатылған педофилдер 8 жыл бойы әкімшілік бақылауда болатынын еске салған вице-министр бұл мерзімді өмір бойына дейін ұзартуды ұсынды.
Қазір түрмеден шыққан әрбір педофил сегіз жыл бойы әкімшілік бақылауда болады. Енді бұл мерзім өмір бойына дейін ұзаруы мүмкін. Біз сотқа үздіксіз өтініш түсіріп, оларды бақылау мерзімін ұзарта беруді сұраймыз. Сот бақылауды жарты жылға деп ұзарта береді. Яғни, біздің болжам бойынша олар өмір бойы есепте тұрады, — деді Лепеха.
Сондай-ақ вице-министр педофилдерге кез келген балалар мекемелерінің, соның ішінде мектептердің маңында жүруіне және түнде үйден шығуына тыйым салу қажеттігін атап өтті.
Фото: F16.kz/жасанды интеллект
