Өңір халқы Сібеге жиылды: ШҚО-да туристік маусым ашылды

Бүгін өңір тұрғындары мен қонақтары Сібенің үшінші көліне жиналды. Ұлан ауданындағы Шалқар көлінде туристік маусым ашылды, деп хабарлайды F16.kz тілшісі.

Іс-шараның басты мақсаты – өңірдің табиғи көрікті жерлерін кеңінен насихаттап, туризмнің әлеуетін арттыру.

Қазір Ұлан ауданында 21 демалыс базасы ресми түрде жұмыс істеп тұр. Туризм саласында 68 адам тұрақты еңбек етіп, 31 маусымдық қызметкер тартылған. Соңғы жылдары ауданда туристер легі айтарлықтай артып келеді. 2023 жылы 15 600 турист келсе, былтыр бұл көрсеткіш 20 774 адамға артты. Олардың арасында шетелдік қонақтар да бар, — деді Ұлан ауданының әкімі Арман Бекбосынов.

Жиылған жұртшылыққа жергілікті шығармашылық ұжымдардың қатысуымен концерт, ұлттық спорт түрлерінен жарыстар, садақ ату, атпен, түйемен және баггимен серуендеу сияқты іс-шаралар ұйымдастырылды. Бұдан бөлек TOR ALTAI демалыс базасына экскурсия, белгілі өлкетанушы Б.Щербаковтың таныстырылымы, төтенше жағдай, құқық қорғау органдарының және кәсіпкерлердің қатысуымен жиын өтті.

$\"\"$

Облысымызда туристер ағыны 2023 жылмен салыстырғанда былтыр 16 пайызға артқан, яғни 430 мыңға жуық турист қабылдадық. Бір уақытта 20500 турист қабылдайтын жатын орын қарастырылған. 368 туристік нысан жұмыс істейді. Айта кету керек, былтыр туризм саласына 15 млрд теңге инвестиция тартылды, — деді облыстық туризм басқармасы басшысының орынбасары Досжан Болатбекұлы.

$\"\"$ Шара барысында ұлттық тағамдар ұсынылған этноауыл, қолөнершілер жәрмеңкесі және қазақ халқының салт-дәстүрін таныстыратын экспозициялар көпшілікке ерекше әсер қалдырды. Кеш соңында жұлдызды аспан астында өткен жастар дискотекасы мерекенің көркін аша түсті.