Ұлттық ұланға қарасты «Шығыс» өңірлік қолбасшылығы радиациялық, химиялық және биологиялық қорғау қызметінің бастығы, подполковник Ғалим Ахмиев Америка Құрама Штаттарының Абердин қаласындағы ғылыми зертхананың сынақ полигонында болып қайтты, деп хабарлайды F16.kz.
Әскери қызметші АҚШ әскерінің жауынгерлік қабілетін дамытуға арналған ғылыми зертханасында жүргізілген зерттеу жұмыстарына белсене қатысты. 1917 жылы құрылған әскери-ғылыми нысан радиациялық, химиялық және биологиялық қорғау саласында тың жаңалықтар ашып, әскер саласына қажетті қорғаныс жабдықтарын шығарып келеді.
Әскери-ғылыми орталық жыл сайын ұзақтығы екі аптадан бір айға дейін созылатын 11 курс ұйымдастырып келеді. Даярлық курсына қатысқан қазақстандық әскери қорғау жабдықтарына арналған әртүрлі құрылғыларды жобалау және әзірлеу бөлімдерінің жұмысымен етене танысты. Сонымен қатар іс-сапар барысында Ұлттық ұланның радиациялық, химиялық және биологиялық қорғау бөлімшелерінің далалық жұмыстары барысында техникалық құрылғылардың қауіпсіздігін қамтамасыз ету мәселелері талқыланды. Құрлық асып, біліктілігін арттырып қайтқан офицер әріптестеріне жұмыстарына қатысты құнды ақпараттар алып келді.
«Шығыс» өңірлік қолбасшылығының баспасөз қызметі
Фото: «Шығыс» өңірлік қолбасшылығының баспасөз қызметі
