Мемлекет басшысы Қасым-Жомарт Тоқаев Google компаниясының Орталық және Шығыс Еуропа бойынша вице-президенті Патрик Ворнкингті қабылдады. Бұл туралы Ақорданың баспасөз қызметі мәлім етті, деп хабарлайды F16.kz.
Кездесу Астана халықаралық форумы аясында өтті. Мемлекет басшысы әлемдік компанияның Қазақстандағы цифрлық трансформацияға елеулі үлес қосқанын айтты.
Мемлекет басшысы Қазақстанның Еуразиядағы цифрлық хабқа айналу жөнінде стратегиялық мақсат қойғанын жеткізді. Аталған стратегия өмірдің барлық саласына жасанды интеллектіні енгізуді көздейді. Ол үшін еліміз цифрлық және коммуникациялық инфрақұрылымға, сондай-ақ есептеу қуатын арттыруға белсенді түрде инвестиция құйып жатыр.
Патрик Ворнкинг жасанды интеллектіні пайдаланып, цифрлық келешекке жол ашу үшін инфрақұрылым әзірлеу және маман даярлау ісінде Қазақстанның қол жеткізген табысына жоғары баға берді.
Фото: Ақорда
