Қазақстанның сыбайлас жемқорлыққа қарсы іс-қимыл агенттігі елімізде кәсіпқой спортқа жұмсалатын қаражат туралы ақпарат жариялады, деп хабарлайды F16.kz тілшісі.
Агенттіктің баспасөз қызметі таратқан ақпаратқа сенсек, 2024 жылы бұл мақсаттарға 53,8 миллиард теңге бағытталған.
Мемлекет басшысының тапсырмасына орай, аталған сома 6,7 миллиардқа азайтылды. Сонымен қатар, 1,3 миллиард теңге бюджетке қайтарылды. Белгілі болғандай, бұл қаражат бонустар мен іс-шараларға негізсіз жұмсалған. Сондай-ақ, инфрақұрылымды пайдалану тиімділігін бақылауды күшейту мақсатында 11 спорт нысаны мемлекет балансына берілді.
– Кәсіпқой клубтар өз спорттық инфрақұрылымын дамытудың орнына басшылықтың жалақысын көтеру, легионерлерге төлем жасау, оқу-жаттығу жиындарын ұйымдастыру сияқты мақсаттарға қаражат жұмсаған. Талдау қорытындысы бойынша спортты дамыту басымдықтарын қайта қарауға, оқу-жаттығу жиындарын өткізуді бақылауды қатаңдатуға, кәсіпқой клубтар мен федерациялардың бюджеттерін қысқартуға, қаржыландыруды орталықтандыруға, сондай-ақ саланы цифрландыруды жеделдетуге бағытталған 50-ден астам ұсыным енгізілді, – деп мәлім етті агенттіктен.
Сонымен қатар, еліміздегі футбол клубтары бірқатар нақты талапты орындаған соң ғана бюджеттен қаржыландыруға ие болатыны белгілі болды. Бұл мемлекеттік қаражатты жұмсауды бақылау мен ашықтықты күшейту үшін жасалып отыр.
– Жаңа талаптар бойынша мемлекеттен қаржы алатын футбол клубтарында балалар-жасөспірімдер және жастар футболының жеке бөлімшелері, жастар командалары, стадионы мен сабақтар өткізуге арналған ғимараты болуға тиіс. Сондай-ақ оқу-жаттығу жиындарына бақылау күшейтіліп, оларды өткізуге лимит енгізіледі, – делінген хабарламада.
