Өскемен қаласының №17 түзеу мекемесіне тыйым салынған зат кіргізбек болған адам ұсталды, деп хабарлайды F16.kz.
«Шығыс» өңірлік қолбасшылығы баспасөз қызметінің хабарлауынша, түрмеде жазасын өтеп жатқан сотталушыға танысы ұялы телефон мен SIM картаны шай қорапшасының ішіне жасырып беріп жіберуге тырысқан. Бірақ 6699 әскери бөлімінің бақылаушысы мен түзеу мекемесі қызметкерлерінің қырағылығының арқасында заңсыздық әшкереленіп, тыйым салынған заттар нұсқаулыққа сәйкес тәркіленді.
Бір қарағанда кәдімгі шайдың қорапшасы. Қолға ұстағанда салмағы ауырлау, ішінде басқа бірдеңе бар сияқты сезілді. Бірден күмән туындады. Ары қарай түзеу мекемесінің қызметкерлерімен бірге тексеру жүргізу барысында шай қорапшасының ішінен өткізуге тыйым салынған зат, яғни байланыс құралы шықты, – деді Ұлттық ұлан бақылаушысы.
Заң бұзған Өскемен қаласының тұрғыны әкімшілік жауапкершілікке тартылды. Тыйым салынған заттарды беруге тырысқан адамға қатысты материалдар жиналып, Әкімшілік құқық бұзушылық туралы кодекстің 481-бабы, 1-бөлігі бойынша сотқа жіберілді.
